మెగ్నీషియం.. మన శరీరంలో మూడువందల జీవరసాయన చర్యలకు బాధ్యత వహిస్తుంది. వీటిలో నరాలూ కండరాల పనితీరు, పేగులూ ఎముకల ఆరోగ్యం, రక్తపోటు, రక్తంలో చక్కెర స్థాయుల నియంత్రణ.. ఇలా ఎన్నో అంశాలు ముడిపడి ఉన్నాయి. ఒంట్లో శక్తి ఉత్పత్తిలో మెగ్నీషియం కీలకపాత్ర పోషిస్తుంది. నిద్ర హార్మోను మెలటోనిన్‌కు ఉత్ప్రేరకంగానూ పనిచేస్తుంది. ఇది నిద్ర బాగా పట్టేందుకు సహకరిస్తుంది. ఇవన్నీ.. మన శరీరానికి సంబంధించి మెగ్నీషియం నిర్వర్తించే కొన్ని ముఖ్య విధులు. అయితే, అపసవ్య జీవనశైలి మన
శరీరంలో మెగ్నీషియం నిల్వలు తగ్గిపోవడానికి కారణం అవుతున్నది.
ఇలా అయితే మేలు..
సహజంగానే శరీరంలో మెగ్నీషియం స్థాయులు పెంచుకునే మార్గాలు అనేకం.
♦ కకోవా గింజల పొడిలో మెగ్నీషియం సహా ఎన్నో పోషకాలు ఉంటాయి. దీనివల్ల నరాల పనితీరు మెరుగుపడుతుంది. మెదడు ఉపశమనం చెందుతుంది. 15 20 రోజులపాటు ఏవైనా పండ్లలో అర టీస్పూన్‌ కకోవా పొడి కలుపుకొని తింటే మంచిది.
♦ తల భారం, పార్శపు నొప్పి ఉన్నవారికి బాదంపప్పు మంచి చేస్తుంది. ఎందుకంటే ఇందులో మెగ్నీషియం, ఇతర ఖనిజాలు సమృద్ధిగా ఉంటాయి. బాదంపప్పులో ఉండే సాలిసిన్‌ శరీరంలో సాలిసైక్లిక్‌ ఆమ్లంగా మారుతుంది. నొప్పి నివారణ బిళ్ల ఆస్పిరిన్‌లో ప్రాథమికంగా ఉండేదీ ఇదే. కాబట్టి రోజూ నానబెట్టిన బాదంపప్పులను తీసుకుంటే సహజ పద్ధతిలో నొప్పి నుంచి ఉపశమనం పొందవచ్చు.
♦ తాజా ఆకుపచ్చని కూరగాయలు మెగ్నీషియం, క్లోరోఫిల్‌కు మంచి వనరులు. వీటివల్ల పేగులు ఆరోగ్యంగా ఉంటాయి. విసర్జక వ్యవస్థ సజావుగా సాగుతుంది. తాజా ఆకుకూరలను భోజనంలో భాగం చేసుకుంటే ప్రయోజనాలు అనేకం.
♦ అవకాడో మెగ్నీషియానికి మంచి వనరు. ఇది మన శరీరానికి అవసరమైన కొవ్వులను అందిస్తుంది. యాంటీ ఇన్‌ఫ్లమేటరీ ప్రయోజనాలనూ కలిగి ఉంటుంది. అవకాడోను సలాడ్స్‌లో భాగం చేసుకుంటే ఆరోగ్యానికి ఎంతో మంచిది.
