క్రెడిట్ స్కోర్‌ను ఎలా పెంచాలి..?

How to Increase Credit Score | Improve Credit Score in 30 Days

మీరు పర్సనల్ లోన్, హోమ్ లోన్, వెహికల్ లోన్ ఇలా ఏ తరహా రుణం తీసుకోవాలన్నా.. క్రెడిట్ కార్డు కోసం అప్లై చేసుకోవాలన్నా.. బ్యాంకులు మీ క్రెడిట్ స్కోర్‌ను చెక్ చేస్తాయి. క్రెడిట్ స్కోర్ వల్ల రుణ గ్రహీత ఆర్థిక పరిస్థితులపై బ్యాంకులు ఒక అంచనాకు వస్తాయి. క్రెడిట్ స్కోర్ ద్వారా బ్యాంకులు లోన్ డిఫాల్ట్‌లు ఏమైనా ఉన్నాయా? క్రెడిట్ కార్డు బిల్లు కరెక్ట్‌గా కడుతున్నారా? ఈఎంఐ ఏమైనా మిస్ చేశారా? వంటి పలు విషయాలను తెలుసుకుంటాయి. క్రెడిట్ స్కోర్ 750కి తక్కువగా ఉంటే.. బ్యాంకులు మీ అప్లికేషన్‌ను రిజెక్ట్ చేయొచ్చు.

క్రెడిట్ స్కోర్ 700 కంటే తక్కువగా ఉంటే రుణ మంజూరును తిరస్కరించే అవకాశాలు ఎక్కువగా ఉంటాయి. కొన్నిసార్లు రుణం అందించినా అధిక వడ్డీ రేటును వసూలు చేస్తాయి. ఏ రకంగా చూసినా తక్కువ క్రెడిట్ స్కోర్ ఉన్నప్పుడు రుణాలు తీసుకోవడం అతిపెద్ద సవాల్. అధిక క్రెడిట్ స్కోర్ కలిగిన రుణగ్రహీతల నుండి బ్యాంకులకు రిస్క్ తక్కువగా ఉంటుందని, అందుకే రుణదాత డబ్బును కోల్పోయే ప్రమాదం తక్కువగా ఉంటుందని, తక్కువ రిస్క్, తక్కువ వడ్డీ రేట్లలోకి అనువదించబడుతుందని చెబుతున్నారు. తీసుకున్న రుణాలు సకాలంలో చెల్లిస్తే ఆ తర్వాత అధిక రుణాలకు వెసులుబాటు కల్పిస్తుంది.

రుణగ్రహీతగా మీ క్రెడిట్ స్కోర్ చెల్లింపు హిస్టరీ, క్రెడిట్ వినియోగం, క్రెడియ్ ఏజ్, క్రెడిట్ రకం, మొత్తం క్రెటిట్ ఖాతాలు వంటి అంశాలను పరిగణలోకి తీసుకొని లెక్కిస్తారు. కాబట్టి రుణం కోసం దరఖాస్తు చేసేటప్పుడు ముందు క్రెడిట్ స్కోర్‌ను తనిఖీ చేయడం మంచిది. నిపుణుల అభిప్రాయం ప్రకారం 750 కంటే ఎక్కువ క్రెడిట్ స్కోర్ మీకు అనుకూల పథకానికి దారితీస్తుంది. ఇది ఉత్తమ బ్యాంకుల ద్వారా రుణం కోసం దరఖాస్తు చేసుకోవడానికి మీకు ఉపకరిస్తుంది. క్రెడిట్ స్కోర్ తక్కువగా ఉంటే మీ క్రెడిట్ హిస్టరీ తగ్గుతుంది. మంచి హోమ్ లోన్ స్కీమ్స్ ప్రయోజనాలను పొందలేరు.

750 కంటే ఎక్కువ క్రెడిట్ స్కోర్ ఉంటే దానిని మంచి క్రెడిట్ స్కోర్‌గా పరిగణిస్తారు. రుణాలు వేగంగా రావడం, తక్కువ వడ్డీ రేటుకు రావడం వంటి ప్రయోజనం ఉంటుంది. క్రెడిట్ స్కోర్ బాగుంటే రుణ కాలపరిమితి కూడా కాస్త ఎక్కువగా ఎంచుకోవచ్చు. దరఖాస్తును వెంటనే అప్రూవ్ చేస్తారు. ప్రాసెసింగ్ ఫీజు, ఇతర ఛార్జీలలో డిస్కౌంట్ ఉంటుంది.

కొన్ని తప్పులు చేయడం వల్ల క్రెడిట్ స్కోర్‌పై ప్రతికూల ప్రభావం పడే అవకాశముంది. క్రెడిట్ స్కోర్ అనేది సాధారణంగా 300 నుంచి 900 మధ్యలో ఉంటుంది. 750కి పైగా క్రెడిట్ స్కోర్ ఉంటే అది బాగునట్లు అవుతుంది. మీ ఆదాయం, సంపద వంటి వాటితో క్రెడిట్ స్కోర్‌కు పని లేదు. తక్కువ వేతనం కలిగిన వారు కూడా అధిక క్రెడిట్ స్కోర్ కలిగి ఉండొచ్చని తెలుసుకోండి. సిబిల్ స్కోర్‌ను ఎలా పెంచుకోవాలో ఒకసారి చూద్దాం.

• రుణాలను ఆన్‌టైమ్‌కి కరెక్ట్‌గా కడుతూ రావాలి. క్రెడిట్ కార్డు బిల్లు కానీ, లోన్ ఈఎంఐ కానీ గడువులోగా చెల్లించండి. మిస్ కాకుండా చూసుకోండి. ఒకవేళ కట్టలేకపోతే మాత్రం క్రెడిట్ స్కోర్‌పై ఎఫెక్ట్ పడుతుంది. అంతేకాకుండా మీరు అదనపు చార్జీల భారం మోయాల్సి వస్తుంది.
• మల్టీపుల్ లోన్స్ తీసుకోవడం మానేయండి. క్రెడిట్ కార్డులకు కూడా ఇది వర్తిస్తుంది. ఎక్కువ లోన్స్ లేదా కార్డులు తీసుకోవడం వల్ల రుణ సంక్షోభంలో కూరుకుపోయే ప్రమాదముంది. దీంతో అంతిమంగా క్రెడిట్ స్కోర్‌పై ఎఫెక్ట్ పడుతుంది.
• రుణాలు తీసుకునే ముందు అన్ని రకాల లోన్స్‌కు ప్రాధాన్యమివ్వండి. సెక్యూర్డ్, అన్‌సెక్యూర్డ్ రుణాల మధ్య బ్యాలెన్స్ పాటించండి. హోమ్ లోన్స్, కార్ లోన్స్‌ను సెక్యూర్డ్ లోన్స్ అని, పర్సనల్ లోన్స్‌, క్రెడిట్ కార్డ్ లోన్స్‌ను అన్‌సెక్యూర్డ్ లోన్స్‌గా భావిస్తారు.
• క్రెడిట్ కార్డులు ఉపయోగించే వారు క్రెడిట్ లిమిట్‌ను పూర్తిగా ఉపయోగించొద్దు. క్రెడిట్ కార్డు లిమిట్‌లో కేవలం 30 శాతం మాత్రమే ఉపయోగించండి. ఈ లిమిట్ కన్నా ఎక్కువగాఉపయోగిస్తే క్రెడిట్ స్కోర్‌పై ప్రతికూల ప్రభావం పడుతుంది. కొన్ని సందర్భాల్లో బ్యాంకులు మీ కార్డు లిమిట్‌ను పెంచుతున్నట్లు తెలియజేస్తాయి. ఇలాంటప్పుడు ఈ ఆఫర్‌ను తిరస్కరించొద్దు. దీని వల్ల క్రెడిట్ యుటిలైజేషన్ లిమిట్ కూడా పెరుగుతుందని గమనించాలి.
• మీరు ప్రతి నెలా చెల్లించే లోన్ ఈఎంఐలు మీ శాలరీలో 50 శాతం దాటకుండా చూసుకోండి. లేదంటే మీ స్కోర్‌పై ఎఫెక్ట్ పడుతుంది.
• ఒకేసారి ఒకటి కన్నా ఎక్కువ రుణాలకు అప్లై చేసుకోవడం వల్ల కూడా ఇబ్బందులు రావొచ్చు. అందువల్ల లోన్‌కు అప్లై చేసే ముందు ఆలోచించాలి. చాలా బ్యాంకులకు ఒకేసారి లోన్‌కు దరఖాస్తు చేసుకోకూడదు. ఇలా చేస్తే ఆ బ్యాంకులు అన్నీ మీ సిబిల్ స్కోర్‌ను కోరతాయి. అప్పుడు స్కోర్‌పై ప్రభావం పడే ఛాన్స్ ఉంది.

ఇకపోతే చాలా వరకు క్రెడిట్ రిపోర్ట్‌లు కరెక్ట్‌గానే ఉంటాయి. అయితే కొన్ని సందర్భాల్లో వీటిల్లో కూడా తప్పులు దొర్లే అవకాశముంది. అందువల్ల క్రెడిట్ రిపోర్ట్‌ను నిశితంగా పరిశీలించండి. ఉదాహరణకు మీరు మీ పర్సనల్ లోన్‌ను పూర్తిగా చెల్లించి ఉంటారు. కానీ క్రెడిట్ రిపోర్ట్‌లో మాత్రం ఇంకా చెల్లించలేదని ఉంటుంది. దీంతో మీ క్రెడిట్ స్కోర్‌పై ఎఫెక్ట్ పడుతుంది. ఇలాంటి తప్పులకు సాధ్యమైనంత త్వరగా సరిచేసుకోండి.